Словачкиот парламент неодамна го изгласа новиот закон за еднодневната вињета, кој ќе стапи во сила од 1 август. Еднодневната вињета ќе важи исклучиво на денот на купувањето, а не 24 часа.
Оваа промена особено може да биде корисна за оние кои планираат кратки патувања низ Словачка или само транзитираат низ земјата.
Годишната вињета, која беше валидна до последниот ден од календарската година, ќе биде укината, но 365-дневната вињета ќе биде достапна за возачите.
Министерот за транспорт, Јозеф Раж, нагласи дека новата еднодневна вињета може да биде голема помош и за домашните краткорочни патници и за странските туристи во текот на летните одмори.
Според извештајот на Инфостарт, според директивите на Европската Унија, еднодневната вињета требало да биде воведена уште кон крајот на март, но словачкото министерство за транспорт немало доволно време да го подготви предлог-законот, па така стапувањето на законот сила се одложило. Оваа промена ја става Словачка во редот на многу земји-членки на ЕУ, кои веќе ја применуваат еднодневната вињета.
